放榜啟示：DSE 35分想對你說的事《我們在香港讀中學的青春》

DSE 35分給DSE考生的啟示
credited by Hein Cream

Transcript

我個名叫龍海恩，上年DSE考35分，而家讀緊Kong U(香港大學)嘅 Global Business(環球商業管理)，人生一帆風順，從此不憂吃喝愛情，上樓都係小兒科，到退休到死為止都可以優哉游哉，我人生嘅改變，一切都係上年放榜嗰日開始。

唔好意思我呃你㗎咋，其實我係，Best 6 考35分，我而家喺台灣讀緊媒體傳達設計，英文叫 Communications Design，分組有3D動畫同埋新媒體 (裝置遊戲果啲)，考大學果陣時其實台灣嘅設計學院只係睇過我嘅作品集，完全唔知道我DSE考幾多分，莫講話上到大學之後啊，真係冇人有興趣問過我DSE考成點㗎。

無人會理幾多分

我嘅例子可能有啲極端，但事實係喺大學，無論考得好定係唔好，根本就唔會有人想知你考幾多分，我老師話頂多揾工果陣時，CV (個人履歷) 要加多一欄你DSE嘅成績囉，但係都僅止如此，至少冇人會好似我咁，攞個分嚟做自我介紹。

我知道睇緊片嘅你而家可能想反駁，講咩DSE個分冇用呀，我而家唔夠分入Band A，攞唔到入場券喇，你呢啲讀書叻嘅人有經歷過我嘅感受咩？，對唔住啊，我可能真係冇，我可能都講唔出一啲比較似安慰嘅內容，但係喺上年放榜嘅班房裡面，我收到分紙開心咗一陣之後，我就同其他同學一齊喊。

花費青春的考試模式

我都好唔開心，我唔係讀名校，我唔鍾意見到我所愛嘅同學，承受前路茫茫嘅痛苦，我唔鍾意自己喺一場不公平嘅比賽裡面脫穎而出，我唔鍾意每一個香港學生，花哂自己最珍貴嘅青春喺一個考試裡面，到頭嚟考評局只係比左幾個數字，去總結評價我哋每一個人嘅努力，備試嘅時候，真係覺得一切都合理咩？，乜你唔覺得DSE就係一個，鬥嘥時間嘅遊戲咩？

我唔否認，我喺唔同嘅科裡面真係有學到嘢例如中英文、通識，我都唔否認，要銜接大學各個科系，中學有唔同嘅選修科，係有需要嘅，但係我都冇辦法唔去承認，我哋浪費喺，操卷，補習，死背書，備試，或者係一啲，根本用唔著嘅考試範圍上面，所用嘅時間同埋青春，真係好多好多好珍貴。

不公平的考試

阿Sir 對唔住啊，我要用Maths去舉例，我就話數學好，做數快啫，我望住我班文科嘅同學仔，被迫好痛苦咁樣去做MC？我唔明，明明大學擺明就唔會揀呢啲科，明明成世人都唔會用到啲條鬼死咁長嘅formula (公式) 。

中文卷一閱讀卷，我唔明，點解我要操咁多份一個半鐘又一個半鐘嘅 Past Paper(歷屆試題)，為嘅就係去睇得明考卷上面嗰啲，正常讀者唔會問作者自己都唔識答嘅問題。

Visual Art (視覺藝術)，我用Hein Cream呢個名喺YouTube拍咗，成13條 VA DSE 一共140幾分鐘嘅片，講真呢啲所謂嘅教學片，裡面無一條係教真正意義上面嘅藝術，全部都係教你點樣喺考評局(手)上面攞高分，你點樣做好呢份卷，(歎氣)，好諷刺啊呵？

可惜更加諷刺嘅係，DSE呢一個似乎係定生死前途嘅戲，你dum得愈多青春落去你嘅分就會愈高，睇下邊個肯dum咋嘛咪會贏囉。睇下邊個資質好， dum時間嘅成本效益愈高咋嘛，如果咁樣係叫"勤奮"，咁我只能說我呢一種係 "求學是為求分數嘅勤奮"，講出嚟都唔知有咩好光彩，同樣地，失手考得差成績唔夠人地好，根本都唔需要感到慚愧，唔係咩？個game本來都錯啦我地被迫玩咋嘛。

所謂教育

愛因斯坦講過話：「教育就係當一個人，喺學校裡面學過嘅嘢全部唔記得哂之後剩低嘅嘢。」

中學畢咗業一年，我終於有時間去學，營養健康跳舞心理語言文化社會歷史藝術哲學設計，呢啲我成世人都唔會唔記得嘅嘢，19年嚟我第一次覺得自己係用100%嘅智商活著，而唔係每朝早醒嚟我都呃自己話，諗咁多做咩啫，做完份paper先講啦，夠鐘上堂喇。

因為拍YouTube我遇上咗好多背景好唔一樣可以叫做「奇葩」嘅人，有人係自學生有人係出生於外國嘅其他學制，有人年紀比我細，但係佢地全部都比我更加早開始自己嘅人生，我喺佢地身上面見到嗰種自信同埋成熟嘅光芒，真係真係好閃好耀眼。

原來，求學真係可以唔係求分數㗎，原來教育係真係可以改革㗎。

但係喺改變發生之前，我好擔心呢條片會唔會俾一啲未讀(考)完DSE嘅學生睇到，會唔會大家睇完之後就無動力温書㗎?

公民抗命

我想分享我當年温書嘅其中一個動力，係我班主任教我嘅，我果陣時問佢話，我都去台灣讀設計㗎啦，考完個分都無人睇嘅，咁辛苦咁努力為咗咩啊？，佢話，「只有考好呢一個試，我先至可以變得有說服力，理直氣狀咁樣同所有人講，我讀設計係自己嘅選擇」。做足哂所有DSE嘅要求，我先至可以喺度好大聲咁講我覺得成件事真係好錯。

我係信佛㗎但係我想引用，耶穌講過話，有人打你嘅右邊面，就連左邊面都轉過嚟俾佢打，呢句說話唔係指緊任何一個不公義嘅時候，而係面對住巨人巨大嘅惡人嘅時候，出生於香港，逃避唔到教育制度嘅時候，你要我考好DSE呀嘛，我考，你要我dum時間呀嘛，我dum，作為學生，順應呢一個學制係一種公民抗命，香港嘅學生係唔會咁容易比呢個學制嘅荒謬考起、打低，我哋係可以去證明呢一個學制係有幾咁荒謬。

改變自已

當然如果你已經係去到考完DSE、放榜嘅階段，你要做嘅就係，唔好放棄，無論結果係點以後要行嘅路係點，唔好放棄，活好，過好，唔好接受考評局評價你嘅呢個分數，唔好俾呢個制度打低，入到大學嘅優點，係你會好方便咁接觸到唔同嘅資源，遇到好多你可以喺佢身上面學到好多嘢嘅人，有好多活動畀你去經歷從中改變自己。